Relarg de Prouvènço

Pèr counèisse e recounèisse li planto d'encò nostre

fotò

Plano de coustiero

Aquéu relarg caup la grando e pichoto Camargo, la Crau, pièi l'estendudo fin qu'à la mar de Berro e peréu li coustiero de Nime. La ribo de mar èi subretout sablouso ounte trachisson de planto especifico en raport emé la sau. Se rebrobon proun de planto de palun dins li Camargo alor qu'en Crau (ancian lié de Durènço) e dins li coustiero, sus de limas safrous, vènon de planto diferènto. Li culturo soun majamen la vigno, li fru e lou ris, mai raramen menado en "bioulougico", ço qu'apauris lou mitan. Lou plantun es eici "mesoumediterran".

fotò

Basso Prouvènço

La basso Prouvènço boutanico s'estènd sus un grand relarg que vai dis Aupiho fin qu'à Grasso, limita à l'uba pèr Durènço, au miejour pèr la mar e la Prouvènço séusouso. Lou sòu èi quàsi fa de cauquié dur. La ribo de mar èi subretout roucassouso au contro d'aquéu de plano de coustiero. Lou plantun di culturo e de garrigo èi "mesoumediterran", alor que dins li colo e pichoto mountagno, coume Ventùri o la santo-Baumo s'atrobon un plantun "subremediterran". I'avèn apoundu lou pichot relarg "termoumediterran" proche de Niço.

fotò

Prouvènço séusouso

Aquelo s'estènd dóu cap Sicié fin qu'à l'Esterèu e caup li relarg séusous di Mauro, dis Isclo d'Or, dóu Tanneroun emé la Colo dóu Rouet ; èi limitado au miejour pèr la mar e au nord pèr la depressioun dóu Permien facho de pelito e de safre. La ribo de mar èi pèr la maje-part roucassouso, mai i'a quàuquis endré sablous (Ièro, sant-Troupès...). Lou plantun es eici subretout "mesoumediterran" à "subremediterran" (Mauro), pamens sus la coustiero se raprocho dóu plantun "termoumediterran". Dins la plano di Mauro trachisson lou suve e lou pin-pignoun.

fotò

Valado dóu Rose

Aquéu relarg ounte s'alargo lou Rose, èi limita à tremount pèr li Ceveno e à trelus pèr li mountagno de Prouvènço preaupenco e d'auto Prouvènço. Au miejour èi barra pèr lis Aupiho. S'atrobo subretout d'espandis de cauquié, mai peréu de relarg safrous. D'un poun de vist dóu plantun es un endré d'escàmbi entre lou nord (emé l'influenci dóu Mistrau) e li planto mediterrano que podon remounta emé la calour. Lou plantun vai eici de l'estànci "coulinen" à "mesoumediterran" e proche de "mediouéuropen" dins li culturo.

fotò

Auto Prouvènço

L'auto Prouvènço boutanico s'estènd à l'entour di bassin d'Ate e de Manosco, remounto au nord long de Durènço e à trelus long de Verdoun. Au miejour èi limita pèr Durènço. Caup li Mount de Vaucluso, lou Leberoun, lou plan de Valensolo. Ei lou relarg dóu chaine-blanc o blacas sus cauquié dur. Lou plantun vai eici de l'estànci "mesoumediterran" à "mountagnard". De nouta la culturo de la lavando o dóu lavandin e peréu de cerealo coume la civado ounte se pòu trouva de planto qu'an despareigu di grando culturo de plano.

fotò

Prouvènço preaupenco

Poudèn destria dins aquéu relarg dos partido separado pèr Durènço. Au couchant un ensèn caupènt Ventour, Lùri e li Barounié. Au levant, uno vasto espandido proun mountagnouso à l'entour di preaup de Digno e Castellano caupènt peréu lou plan de Canjuers e li mount dóu Cheiroun. Eici l'estànci "mountagnard" èi lou mai impourtant emé de relarg "mesoumediterran". Alor qu'en bas di mountagno, is adré, l'influènci mediterrano es encaro impourtanto, is uba e en auturo poudèn trouba de planto subaupenco.

fotò

Aup marino

Aquéu relarg caup li mountagnage séusous dóu Mercantour e de l'Argentèra (lou poun lou mai aut fai 3297 m) entoura de mountagno de cauquié e de safre. Li valado impourtanto soun aquéli de la Tinèio, de la Vesubìo, de la Rouia, de l'Argentèra e de l'Assèdras. Eici lis estànci van de "mesoumediterran" à "aupin", èi pèr acò qu'èi forço drud dóu poun de vist boutani. De nouta la presènci de noumbróusi planto endemico (relarg emé hotspot).

fotò

Aup interno dóu miejour

Sian dins lou relarg lou mai mountagnous. Au miejour èi limita pèr la Prouvènço preaupenco e lis aup marino. Au nord remounto fin qu'à Briançoun. Caup uno longo lengo que s'enfounso dins li preaup (emé li valado dóu aut Verdoun e de l'Ubaio), li mountagnage de l'Embrunés, dóu Parpaioun e dóu Queiras. Se trobo peréu l'auto valado de Durènço (entour de Gap). La roco èi pulèu cauquiero pas o pulèu metamourfico, mai segound li relarg s'atrovo de sòu séusous (napo). Lis estànci van de "subrediterran" (dins lou miejour) à "aupin".